Zbarkimi i UK në Kuvajt: Po lartësohet Flamuri i Republikës së Kosovës

Presidentja  e shtetit, Vjosa Osmani, u shpreh krenare më ushtarët e Ushtrisë së Kosovës (UK), të cilët po shërbejnë në mision në Kuvajt. Ushtarët e Kosovës, në Kuvajt po qëndrojnë në kuadër të misionit ushtarak amerikan.

“Jashtëzakonisht krenare me ushtarët tanë, të cilët po e lartësojnë flamurin e Republikës së Kosovës në Kuvajt. Kosova do të jap kontributin e saj në misione paqeruajtëse në botë përkrah aleatëve tanë. Falënderim i veçantë për mbështetjen e Shteteve të Bashkuara të Amerikës e Gardës Kombëtare të Ioëas”, ka shkruar Osmani në profilin e saj në Facebook.

Ndërkohë rreth kësaj ngjarje ka reaguar edhe kryeministri i Kosovës, Albin Kurti. Ai ka thënë se ky është hap i rëndësishëm përpara.

“Forca e Sigurisë së Kosovës (FSK) është në misionin e saj të parë ndërkombëtar të bashkëpunimit me ushtrinë amerikane. Me vite mësim dhe trajnime, ne tani jemi gati të kontribuojmë në paqenë dhe sigurinë globale. Një moment krenarie”, ka shkruar Kurti në Twitter.

Përveç Osmanit dhe Kurtit ka reaguar edhe ish kryeministri Avdullah Hoti, në kohën e të cilit ishte urdhëruar dërgimi i trupave të FSK-së në Kuvajt.  Hoti ka thënë misioni i parë ndërkombëtar i FSK-së në Kuvajt, në krah të ushtrisë të SHBA-së, është realizim i vizionit të themeluesve të shtetit të pavarur të Kosovës dhe ëndrrës të të gjithë të rënëve për lirinë e Kosovës.

“Ky është moment i jashtëzakonshëm për ne që e duam Kosovën si shtetin tonë të përhershëm, që besojmë fuqishëm dhe angazhohemi për përhershmërinë e Kosovës së pavarur, të integruar në BE dhe NATO dhe në miqësi të përhershme me SHBA. Jam krenar që në mandatin tonë qeverisës arritëm të sigurojmë mbështetjen amerikane për të realizuar këtë mision”, thuhet në njoftim./tipografi/