Shqipëri, dënohet me 2 vjet e 8 muaj burg radikali që propagandonte për ISIS-in

Në Shqipëri, Gjykata e Posaçme kundër Krimit të Organizuar dhe Korrupsionit dha sot vendimin për 45 vjeçarin nga Kavaja, Gentian Çollaku, i cili u arrestua në prill të këtij viti. Ai u dënua nën akuzën e “Nxitjes dhe propagandës për qëllime terroriste”, me 4 vjet e 6 muaj, por për shkak të gjykimit të shkurtuar do të duhet të vuajë vetëm 2 vjet e 8 muaj burgim. Sipas Prokurorisë së Posaçme “ai shfaq një profil të lartë radikal, duke pranuar se është mbështetës dhe ndjekës i drejtuesve të ISIS-t”.

Hetimet ndaj tij kishin nisur në fillim të vitit 2021, pasi Drejtoria e Antiterrorit kishte konstatuar se nga një profil në Facebook ishin publikuar foto me luftëtarë të armatosur të ISIS-it apo edhe foto të liderit të organizatës terroriste të njohur me emrin Abu Bakr al-Baghdadi. Hetimet e mëtejshme zbuluan se Çollaku kishte hapur 16 profile në Facebook, me emra të ndryshëm.

Prokurorët morën informacione zyrtare dhe nga kompania Google, për të identifikuar përdoruesin e adresave të emailit të shfrytëzuara për hapjen e llogarive në Facebook. Në këto llogari, sipas Prokurorisë së posaçme, janë publikuar materiale propogandistike pro organizatës dhe ideologjisë së Shtetit Islamik (ISIS), apo dhe në mbështetje të imamëve shqiptarë të dënuar kohë më parë për terrorizëm.

Çollaku, sipas hetimeve, ka mbajtur lidhje dhe kontakte me elementë radikalë nga Kosova, Mali i Zi dhe Maqedonia e Veriut, ndërsa vetë, ka bërë thirrje publike, te ndjekësit e tij, për luftë në mbështetje të Shtetit Islamik dhe për kryerjen e veprave me qëllime terroriste.