Senati amerikan miraton paketën e ndihmës,  votohet plani 1.9 trilionë dollarë

Senati Amerikan ka votuar pro miratimit të paketës së tretë të ndihmës për përballimin e pandemisë. Plani prej 1.9 trilionë dollarësh i propozuar nga presidenti Joe Biden u votua me 50 vota pro dhe 49 kundër dhe tani do t’i kalojë Dhomës së Përfaqësuesve, që gjithashtu pritet ta miratojë.

Sipas presidentit Biden, ky plan do t’i vijë në ndihmë qytetarëve që po luftojnë me Covid-19, teksa planifikohet që 350 miliardë dollarë t’i shkojnë qeverive shtetërore dhe vendore, dhe 140 miliardë dollarë shkollave. Plani gjithashtu siguron 49 miliardë dollarë për testime dhe studime të thelluara mbi Covid-19, si edhe 14 miliardë dollarë për shpërndarjen e vaksinës, shkruan Euronews Albania.

Përpara votimit, plani u diskutua gjerësisht në disa pika kyçe të tij. Partia Demokratike kërkoi që të ulej në 300 dollarë për javë pagesa federale për papunësinë dhe që kjo shumë të jepet deri në 6 shtator, përkundër afatit fillestar që skadon në muajin mars.

Kjo krizë, e konsideruar më e rënda e shëndetit publik në Shtetet e Bashkuara, la thuajse 523 mijë persona të vdekur, 29 milionë të infektuar dhe një nivel papunësie prej 6.2%./tg/