Përshpejtohet procesi i vaksinimit, OBSH aprovon ‘Sinopharm’

Organizata Botërore e Shëndetësisë aprovoi të premten për përdorim emergjent vaksinën anti-COVID “Sinopharm”. Bëhet fjalë për vaksinën e parë kineze që merr dritën e gjelbër të OBSH-së, teksa po prodhohet në shumë vende të botës.

Deri më sot OBSH kishte dhënë leje për përdorim vetëm të vaksinave të prodhuara nga kompanitë “Pfizer”, “Moderna”, “Johnson & Johnson” dhe “Astra Zeneca”.

“OBSH futi në listën e përdorimit vaksinën anti-COVID të prodhuar në Pekin, duke e bërë atë të gjashtën që merr vlerësim për sigurinë, efikasitetin dhe cilësinë. Kjo zgjeron listën e vaksinave të përfshira nga COVAX”, shprehet Tedros Adhanom Ghebreyesus, drejtor i përgjithshëm i OBSH-së.

OBSH miraton përdorimin e vaksinës kineze

“Sinopharm” po përdoret gjerësisht në Serbi, ku shumë njësi të lëvizshme vaksinimi po shkojnë tek komunitetet më të cenueshme. Një prej tyre ishte fshati Vrelo, ku një prej njësive shkoi për t’u garantuar banorëve akses tek dozat.

Një maratonë treditore vaksinimi nisi të premten në kryeqytetin e Rumanisë, Bukuresht, ku autoritetet po nxitojnë të vaksinojnë vendin me mbi 19 milionë banorë.

Eventi mbështetet nga 1.200 vullnetarë, ndërkohë që do të shtrihet edhe në qytete të tjera.

Mbi 500 persona janë vaksinuar në tre ditë në periferitë e Parisit, pasi autoritetet shëndetësore ngritën pika vaksinimi në zemrën e lagjeve kryesore.

Autoritetet synojnë të injektojnë dozat tek popullsia që nuk ka për qëllim apo i mungon motivimi për të lënë një takim në qendrat e mëdha të vaksinimit.