Para rektoratit, protestohet kundër gjuhës seksiste të Kastratit

Aktivistë të shoqërisë civile sot organizojnë protestë kundër gjuhës seksiste të deputetit Ardian Kastrati nga Partia Demokratike e Kosovës. Ata po ashtu do të kërkojnë përjashtimin e tij nga Universiteti i Prishtinës.

Protesta mbahet në oborrin e rektoratit të Universitetit të Prishtinës duke filluar në orën 11:00. Kujtojmë se deputeti i PDK-së, Ardian Kastrati, pas zgjedhjes së Vjosa Osmanit presidente ka shkëputur një fragment nga shkrimtari Faik Konica për të satirizuar ndaj saj.

“…një fshatarake me një bark si kadë e me këmbë si magje, me një palë duar të trasha e të pjekura, e me fytyrë të kuqe si piper t’Ohrit”, është pjesa që ka shkëputur Kastrati.
Ai ka fshirë postimin nga profili i tij në Facebook pas kritikave të shumta që mori.