Nuk duhet lejuar të dëmtohet imazhi i Policisë, thotë Hoti

Kryeministri në detyre, Avdullah Hoti, ka deklaruar të hënë se imazhi i mirë i Policisë nuk duhet të dëmtohet, nga rastet e izoluara të keqpërdorimit të uniformes se policisë së shtetit. Hoti këtë deklaratë e ka dhënë pas takimit që pati me drejtuesit e Policisë së Kosovës.

Postimi i plotë i Hotit:

Nuk duhet lejuar që rastet e izoluara të dëmtojnë imazhin e policisë së Kosovës, institucionit më të besuar nga qytetarët për vite me radhë.

Nga drejtori i Përgjithshëm i Policisë së Kosovës, z. Samedin Mehmeti dhe Kryeshefi Ekzektuiv i Inspektoratit të Policisë së Kosovës z. Kushtrim Hodaj,  kërkova që menjëherë, të ndërmarrin të gjitha masat e nevojshme ndaj çdo zyrtari policor i cili keqpërdorë detyrën. Sjelljet e tilla janë të pa pranueshme.

Po ashtu nga Inspektorati Policor kërkova që të trajtoj me shumë përkushtim të gjitha ankesat e qytetarëve që vijnë në adresë të Policisë, të jenë këmbëngulës dhe të pa kompromis në respektimin e etikës dhe sjelljes profesionale të këtij institucioni.