Nga 1,116 ankesa, pranohen vetëm 144

Paneli Zgjedhor për Ankesa dhe Parashtresa (PZAP) ka konfirmuar të martën se i kanë shqyrtuar të gjitha ankesat, edhe ato që kanë arritur përmes e-mail-it brenda afatit prej 24 orësh, shkruan Evropa e Lirë.

Në total, përmes e-mail-it kanë arritur 1,116 ankesa, por sipas zyrtarëve të PZAP-së, vetëm 281 e-mail-e kanë qenë të kompletuar me dokumentacionin përkatës.

“PZAP-ja 144 apele i ka pranuar si të bazuara dhe ka vendosur që ta urdhërojë KQZ-në që këta votues t’i përfshijë në listën e votuesve jashtë Kosovës për të votuar, ndërsa 124 apele i ka refuzuar si të pabazuara pasi që parashtruesit e apelit nuk kanë ofruar dëshmi të mjaftueshme. Ndërsa 13 apele i ka hedhur si të parregullta. PZAP-ja i ka miratuar si të bazuara edhe dy apele që kanë arritur përmes postës”, sqaroi për Radion Evropa e Lirë, Mulë Desku, kryesues i sekretariatit të PZAP-së.

Ai nuk komentoi arsyet e ndryshimit të vendimit të PZAP-së për pranimin e ankesave përmes e-mail-it.