fbpx
Lidhu me Ne!

Lajme

Mustafa: S’kërkoj votë për vete, por për personalitetin e shquar të Hotit

Publikuar

Kryetari i Lidhjes Demokratike të Kosovës (LDK), Isa Mustafa, në përmbyllje të fushatës zgjedhore tha të premten se kandidati për kryeministër, Avdullah Hoti, është personalitet i shquar, i ditur, i matur dhe i sprovuar në detyrat më të rëndësishme shtetërore.

“Si kryetar i LDK-së jam i bindur se juve, qytetarëve të respektuar, ua kemi ofruar një kandidat të ditur, të pjekur dhe të sprovuar për Kryeministër, z. Avdullah Hoti. Ua kemi propozuar listën me kandidatë për deputetë, që meritojnë respektin, përkrahjen dhe votën tuaj”, tha Mustafa.

Ai tha se Lidhja Demokratike e Kosovës mbetet besnike ndaj vlerave të saj, të cilat janë vlera evropiane, që i ndajmë dhe i kultivojmë në familjen e Partive Popullore Europiane.

“Për ne, vlerë mbi vlerat është shteti ynë. Republika e Kosovës, shtet i demokracisë perëndimore që kultivon partneritet me BE-në dhe miqësi të përhershme me SHBA-të. Shteti është mbi të gjitha! Për Lidhje demokratike të Kosovës, vlerë e veçantë është familja, integriteti i saj, kujdesi, edukimi, ardhmëria e fëmijëve; perspektiva e të rinjëve. Besimi në Zot është fundamenti yni si parti konzervatore; besimi në zot na bënë që të besojmë në njëri-tjetrin të kemi harmoni dhe solidaritet, të ndajmë fatin e përbashkët”.

“Ekonomia e tregut, iniciativa private, konkurrenca e lirë janë bazë e zhvillimit tonë. Tregu që aspirojmë është tregu unik evropian; është hapësira ekonomike evropiane; është lëvizja e lirë e qytetarëve pa viza; lëvizja e mallrave tona në vendet e BE-së. Ekonomisë së tregut ia njohim edhe karakterin social, sepse pjesë e saj integrale janë edhe ata që kërkojnë punë, ata që kanë përkujdesje sociale dhe ata që s’mund të punojnë”, tha kreu i LDK-së.

Ai tha se LDK-ja i respekton rivalët politikë, respekton të drejtën demokratike të çdo njeriu dhe të çdo subjekti politik për të garuar dhe se respekton dëshirën e tyre për të qeverisur.

“Nuk miratojmë dukuritë dhe tendecat për kapjen e shtetit; etjen për krejt pushtetin; për totalitarizëm dhe autokraci. Të gjithë ne, përveç atyre që kanë lindur pas lufte, e kemi provuar dhe kemi sprovuar karakterin e shtetit totalitar, të njëmendësisë politike. Nuk duhet të lejojmë ta përjetojmë edhe njëherë në asnjë formë dhe në asnjë variant”.

“Ne përkrahim ndryshimin, por jo çdo lloj ndryshimi. Jo ndryshimin si propagandë. Ndryshimi për LDK-në është ai që e forcon shtetin e Kosovës, e bënë më funksional, që na siguron njohje të reja dhe përmbyllje të plotë të shtetësisë, me njohje nga 5 vende të BE-së, anëtarësim në OKB dhe në NATO. Këto ndryshime më së miri i bënë LDK, si parti shtetformuese”.

Kryetari i LDK-së tha se sot nuk kërkon votën për veten time, por se e kërkon votën për Lidhjen Demokratike të Kosovës, të cilën e quajti fortesë e shtetndërtimit.

“Kërkoj votën tuaj për Kryeministrin Hoti, për kandidatët tanë për deputetë: të votoni ministrat tanë të suksesshëm, deputetët që kanë mbrojtur interest tuaja, kryetarët e suksesshëm të komunave, ekonomistët, ingjinierët, profesorët, mësuesit, ndërmarrësit, bujqit, fermerët, juristët, clirimtarët; të votoni gratë, të rinjtë e burrat që frymojnë dije e përgjegjësi për këtë vend e për këtë popull”.

“Juve anëtarëve të LDK-së, besnikëve tanë, ju garantoj se interesat e LDK-së dhe interest e Kosovës do t’i vëmë në çdo kohë dhe në çdo situatë para interesave personale. Se do ta ruajmë vitalitetin dhe unitetin tonë dhe do të jemi të përgjegjshëm për të gjitha sfidat që na presin”.

Vazhdo më shumë

Tipografi.info, është medie e pavarur që synon avancimin e lirisë se shprehjes, pa ia cenuar të drejtat askujt! Tipografi.info përmes raportimi të tij do të kujdeset që të promovojë vlerat dhe institucionet demokratike dhe të avancoje të drejtat e njeriut. Portali tipografi.info, menaxhohet nga "AP+" sh.p.k., rr. Xheladin Hana, Prishtinë, Kosovë. Kontakt: info@tipografi.info | 044 000 E krijuar nga DBC me shumë 2021