fbpx
Lidhu me Ne!

Lajme

KQZ huazon 50 kamera regjistruese

Kamerat regjistruese janë të planifikuar të përdoren vetëm në Qendrën e Numërimit dhe Rezultateve, pra jo edhe në qendra të votimit në ditën e votimit.

Publikuar

Komisioni Qendror i Zgjedhjeve i Kosovës i është drejtuar me një kërkesë të veçantë KQZ-së së Shqipërisë për huazimin e 50 kamerave regjistruese, të cilat janë përdorur në ditën e zgjedhjeve parlamentare më 25 prill.

Zëdhënësi i KQZ-së, Valmir Elezi ka thënë se kanë marrë përgjigje pozitive dhe marrëveshja e bashkëpunimit ndërmjet këtyre dy institucioneve pritet të nënshkruhet së shpejti në Tiranë, shkruan RTK.

Kamerat regjistruese janë të planifikuar të përdoren vetëm në Qendrën e Numërimit dhe Rezultateve, pra jo edhe në qendra të votimit në ditën e votimit.

“Duke u nisur nga bashkëpunimi i mirë i dy institucioneve tona që kanë mes vete, KQZ e Kosovës ka kërkuar nga KQZ e Shqipërisë huazimin e 50 kamerave regjistruese të cilat janë përdorur në ditën e zgjedhjeve parlamentare më 25 prill. Qëllimi i këtij huazimi është përdorimi i tyre në Qendrën e Numërimit dhe të Rezultateve ku bëhet grumbullimi i të gjithë materialit zgjedhor pas ditës së zgjedhjeve si dhe është vendi ku bëhet përpilimi i rezultateve përfundimtare”, tha Elezi.

Sipas KQZ-së, përdorimi i këtyre kamerave do të ndihmonte ata në rritjen e integritetit të procesit zgjedhor, pasi në këtë qendër zhvillohen disa procese të rëndësishme pas ditës së zgjedhjeve, siç është numërimi i votave me kusht dhe votave me postë si dhe bëhet rinumërimi eventual i ndonjë vendvotimi.

“Përdorimi i këtyre kamerave regjistruese do të ndihmonte KQZ-në në rritjen e integritetit të procesit zgjedhor sidomos gjatë procesit të numërimit dhe rinumërimit eventual të ndonjë vendvotimi në Qendrën e Numërimit dhe Rezultateve gjatë procesit të zgjedhjeve lokale. Në këtë qendër siç dihet pas ditës së zgjedhjeve grumbullohet i gjithë materiali zgjedhor nga e gjithë Republika e Kosovës dhe natyrisht aty bëhet edhe numërimi i votave me kusht dhe votave me postë si dhe rinumërimi eventual i ndonjë vendvotimi”, tha Elezi.

Zgjedhjet lokale në Kosovë do të mbahen më 17 tetor dhe pritet të zgjedhën kryetarët e 38 komunave të Kosovës dhe anëtarët e 38 Kuvendeve Komunale.

Vazhdo më shumë

Tipografi.info, është medie e pavarur që synon avancimin e lirisë se shprehjes, pa ia cenuar të drejtat askujt! Tipografi.info përmes raportimi të tij do të kujdeset që të promovojë vlerat dhe institucionet demokratike dhe të avancoje të drejtat e njeriut. Portali tipografi.info, menaxhohet nga "AP+" sh.p.k., rr. Xheladin Hana, Prishtinë, Kosovë. Kontakt: info@tipografi.info | 044 000 E krijuar nga DBC me shumë 2021