Kosnett takon Lajçakun, riafirmon mbështetjen për dialogun

Ambasadori i Shteteve të Bashkuara në Kosovë, Philip Kosnett, takoi të hënën të dërguarin e posaçëm të Bashkimit Evropian për dialogun Kosovë-Serbi, Mirosllav Lajçak, të cilit i riafirmoi “mbështetjen e SHBA-së për një proces bashkëpunuës dialogu, të udhëhequr nga BE-ja”.

“Qëllimi ynë: një zgjidhje gjithëpërfshirëse dhe integrim më i thellë euro-atlantik, nga i cili përfitojnë të gjithë qytetarët e Kosovës dhe të Serbisë”, tha Kosnett, transmeton Ambasada amerikane përmes një postimi në Facebook.

Lajçak arriti të hënën në Kosovë, ku takoi edhe kryetarin e Lëvizjes Vetëvendosje, Albin Kurti, i cili i ka fituar zgjedhjet parlamentare të 14 shkurtit në Kosovë.

Kurti, më herët, ka thënë se dialogu me Serbinë nuk do të jetë në mesin e prioriteteve të Qeverisë së tij.

Sipas raportimeve të mediave në Prishtinë, Kurti, edhe pas takimit me Lajçakun, tha se nuk e mohon rëndësinë e dialogut me Serbinë, por shtoi se ai duhet të jetë i përgatitur mirë dhe i sinqertë.

Kurti tha se “nuk është në presion të kohës” dhe nuk dha datë se kur mund të rifillojë dialogu.

Lajçak vazhdon vizitën në Kosovë të martën, me një takim me ushtruesen e detyrës së presidentit, Vjosa Osmani, të paraparë për në orët e mëngjesit.