fbpx
Lidhu me Ne!

Lajme

KMDLNj e quan dhunë elektorale dhe tendencë për dominim, ndërhyrjen e Listës serbe tek partitë e komuniteteve tjera

Publikuar

Këshilli për Mbrojtjen e Drejtave dhe Lirive të Njeriut duke komentuar zhvillimet që po ndodhin në partitë e komuniteteve pakicë në Kosovë, ka kërkuar rinumërim të votave në të gjitha vendvotimet ku dyshohet se ka pasur vota të kontrabanduara ndërmjet partive të pakicave, e që kanë ndikuar në rezultatin e kandidatëve për komunitetin jo – shumicë, që në rastin konkret janë dëmtuar duke u eliminuar nga mundësia të përfaqësojnë komunitetin që i takojnë, duke e konsideruar këtë si dhunë elektorale e Listës Serbe dhe përpjekje e saj për dominim edhe te komunitetet jo-shumicë përkatësisht te boshnjakët , romët, goranët, ashkalinjtë dhe të tjerët. /tg/

Reagimi i plotë i KMDLNj-së:

Me Kushtetutën e Republikës së Kosovës, anëtarët e komuniteteve jo-shumicë gëzojnë të drejta të veçanta e që mund të merren edhe si shembull edhe për vendet me një demokraci më të zhvilluar se në Kosovë.

Në këtë kontekst janë edhe garancitë për vendet e rezervuara e që në zgjedhjet e parakohshme të 14 shkurtit 2021 po rrezikohen seriozisht për shkak të ndërhyrjes së Beogradit, përmes Listës Serbe të ndryshojë arkitekturën e përfaqësimit të komuniteteve jo – shumicë duke kontrabanduar vota për favoritët e tyre në mënyrë që Lista Serbe të kontrollojë 2/3 e deputetëve të komuniteteve jo –shumicë.

Më herët , nën kërcënim , shantazh dhe duke përdorur edhe dhunë fizike , u përjashtuan nga loja politike në Kosovë të gjitha partitë politike serbe në Kosovë, që ishin integruar në strukturat shtetërore dhe shoqërore të Kosovës dhe që punonin për integrimin e serbëve në Kosovë e që, i tëri ky proces kundërshtohej nga Serbia, përmes Listës Serbe.

Kalimi në heshtje i eliminimit të dhunshëm të partive politike që përfaqësonin serbët e Kosovës në planin afirmativ, krijoi kushtet që në zgjedhjet e fundit , kjo dhunë elektorale dhe përpjekje për dominim të shtrihet edhe te komunitetet jo-shumicë përkatësisht te boshnjakët , romët, goranët, ashkalinjtë dhe të tjerët.

Në këtë mënyrë, me vota të kontrabanduara po krijohet një përfaqësim i imponuar i komuniteteve jo-shumicë, në dëm të përfaqësuesve të vërtetë dhe legjitim të këtyre komuniteteve dhe në kundërshtim të plotë me Kushtetutën e Kosovës dhe të drejtat e njeriut që garanton, në mënyrë të vullnetshme, pa imponim, pa ndërhyrje politike dhe krejtësisht të pavarur të votoni , të zgjidhni apo të zgjidheni. Kjo , në zgjedhjet e fundit është shkelur në mënyrë flagrante sikur që është bërë kriminalizimi i procesit të votimit për komunitetet jo – shumicë, i planifikuar nga Serbia dhe i zbatuar nga Lista Serbe.

KMDLNj solidarizohet me votuesit e komuniteteve jo – shumicë, votat e të cilëve janë dhunuar nga Beogradi përmes kontrabandimit të votave nga votuesit e nacionalitetit tjetër, në rastin konkret të nacionalitetit serbë e që kanë qenë mbizotëruese për eliminim të përfaqësuesve të vërtetë të kandidatëve të komuniteteve jo – shumicë, në rastin konkret të atij boshnjakë, romë, goranë dhe ashkalinjë.

KMDLNj kërkon që të bëhet rinumrimi i votave në të gjitha vendvotimet ku dyshohet se ka pasur vota të kontrabanduara e që kanë ndikuar në rezultatin e kandidatëve për komunitetin jo – shumicë që në rastin konkret janë dëmtuar duke u eliminuar nga mundësia të përfaqësojnë komunitetin që i takojnë.

Partitë jo-shumicë duhet ta ndjekin rrugën ligjore, pas certifikimit të rezultateteve në mënyrë që t’i mbrojnë dhe realizojnë të drejtat e tyre që ua garanton Kushtetuta e Republikës së Kosovës dhe, në këtë drejtim do ta kenë përkrahjen e parezervë të KMDLNj -së. Nëse edhe pas këtij krimi elektoral që paraqet ndërhyrje të drejtpërdrejtë të Serbisë, përmes Listes Serbe, kalohet pa ndërmarrë veprime ligjore dhe kushtetusese , atëherë do të përligjet një presedan shumë i rrezikshëm që, në mënyrë të tërthortë apo të drejtpërdrejtë, varësisht se sa deputetë do të kontrollohen nga Lista Serbe, përfaqësuesit e komuniteti jo – shumicë do ta pësojnë fatin e partive politike serbe në Kosovë të cilat, thuaja janë përjashtuar nga procesi politik dhe vendimmarrja për fatin e serbëve që janë integruar apo duan të integrohen në Kosovë. Kjo nuk duhet të lejohet në asnjë mënyrë, në të kundërtën edhe procesi i votimit , sidomos për pjesëtarët e komunitetit jo – shumicë nuk do të ketë kuptim për faktin se për votat e tyre do të vendoset në Beograd dhe jo në Prishtinë.

Do të ishte mirë dhe, madje e domosdoshme që pas shpalljes së rezultateve preliminare, organet e hetuesisë të hetojnë dyshimet e ngritura nga kandidatët dhe partitë politike të komunitetit jo – shumicë për manipulim të votave nga Serbia dhe Lista Serbe. Realisht , nëse për Iniciativën e Boshnjakëve në Veri të Mitrovicës votojnë kryesisht dhe në disa raste ( nga disa komuna serbe ) ekskluzivisht votuesit serbë, atëherë, vetvetiu lindin dyshime të bazuara për vota klienteliste, të kontrabanduara dhe për qëllime politike.

Vazhdo më shumë

Tipografi.info, është medie e pavarur që synon avancimin e lirisë se shprehjes, pa ia cenuar të drejtat askujt! Tipografi.info përmes raportimi të tij do të kujdeset që të promovojë vlerat dhe institucionet demokratike dhe të avancoje të drejtat e njeriut. Portali tipografi.info, menaxhohet nga "AP+" sh.p.k., rr. Xheladin Hana, Prishtinë, Kosovë. Kontakt: info@tipografi.info | 044 000 E krijuar nga DBC me shumë 2021