Kërkohet dorëheqja e Lulzim Bashes

Një grup anëtarësh të Partisë Demokratike nëpërmjet një deklarate kanë kërkuar dorëheqjen e z. Basha nga posti i kryetarit të PD-së. Kërkesa e tyre vjen pas rezultatit që PD-ja me në krye Lulzimin Bashën arriti në zgjedhjet e 25 prillit.

“Ne kërkojmë mbledhjen urgjente të Këshillit Kombëtar të Partisë Demokratike, me qëllim hapjen e rrugës për të nisur një proces rrënjësor reflektimi dhe analize, të domosdoshëm dhe jetësorë për Partinë, proçes, i cili të mundësojë zgjedhje të jashtëzakonshme, me një garë të drejtë, të hapur e demokratike për strukturate reja drejtuese të Partisë,” shkruhej në deklaratën e anëtarëve të grupit të PD-së.

Disa nga emrat e anëtarëve të Partisë Demokratike që kanë kërkuar dorëheqjen e z. Basha nga posti i kryetarit janë ish presidenti Bujar Nishani, Arben Imami, ish kryetari i KQZ-së Arben Ristani, Edith Harxhi, Endira Bushati etj.

Rezultati i zgjedhjeve të 25 prillit nxorri fituese Partinë Socialiste me 74 mandate, Partia Demokratike mori 59 mandate, Lëvizja Socialiste për Integrim arriti të merrte 4 mandate dhe PSD-ja 3 mandate.