fbpx
Lidhu me Ne!

Lajme

FIFA inicion edhe një procedurë disiplinore ndaj Serbisë, trajneri serb “nuk ka koment”

Trajneri i kombëtares së Serbisë, Dragan Stojkoviq-Piksi, tha se “nuk ka koment” për procedurat disiplinore që ka nisur FIFA.

Publikuar

Federata Botërore e Futbollit (FIFA) nisi procedura disiplinore ndaj Federatës së Futbollit të Serbisë, nën dyshimet se kombëtarja serbe ka shkelur disa rregulla gjatë një ndeshjeje me kombëtaren e Zvicrës, në kuadër të Kampionatit Botëror të Futbollit.

FIFA veproi në bazë të ankesës së Federatës së Futbollit të Kosovës (FFK), e cila tha se gjatë ndeshjes së zhvilluar më 2 dhjetor, janë dëgjuar “fyerje të rënda nga trajneri i përfaqësueses së Serbisë” në drejtim të shqiptarëve dhe se janë vërejtur “veprime raciste nga tifozët serbë”.

Në kombëtaren e Zvicrës luajnë disa futbollistë me prejardhje nga Kosova, përfshirë kapitenin Granit Xhaka.

Kryetari i FFK-së, Agim Ademi, tha për Radion Evropa e Lirë se “është mirë që FIFA është marrë me këtë punë dhe e ka marrë seriozisht”.

Trajneri i kombëtares së Serbisë, Dragan Stojkoviq-Piksi, tha se “nuk ka koment” për procedurat disiplinore që ka nisur FIFA.

Ai u pyet për to nga gazetarët në Beograd, pasi u kthye nga Katari, ku edhe po zhvillohet Kampionati Botëror i Futbollit.

Sipas njoftimit të FIFA-s, procedurat e nisura kundër Federatës së Futbollit të Serbisë lidhe me disa shkelje të mundshme, si: sjellje e pahijshme e lojtarëve dhe zyrtarëve, diskriminim dhe shkelje e rendit dhe sigurisë gjatë ndeshjes.

Përplasja midis lojtarëve serbë dhe kapitenit të Zvicrës, Granit Xhaka. Katar, 2 dhjetor 2022.

Pas fitores së Zvicrës më 2 dhjetor, Serbia u skualifikua nga kampionati, ndërsa Zvicra vazhdon garën tutje.

Gjatë lojës u vunë re disa përplasje fizike dhe verbale midis lojtarëve serbë dhe kapitenit të Zvicrës, Granit Xhaka.

Përveç Xhakës, për Zvicrën luan edhe Xherdan Shaqirin me prejardhje nga Kosova dhe Ardon Jashari me prejardhje nga Maqedonia e Veriut.

Çfarë parasheh Kodi Disiplinor i FIFA-s?

Sipas nenit 12 të Kodit Disiplinor të FIFA-s, lojtarët dhe zyrtarët mund të ndëshkohen me pezullim nga një ndeshje shkaku i sjelljes josportive, apo nga tri ndeshje për sulm fizik ndaj një lojtari apo personi tjetër.

Neni 13 thotë se kushdo që ofendon dinjitetin apo integritetin e një vendi, personi apo një grupi njerëzish përmes shprehjeve apo veprimeve diskriminuese ose nënçmuese, mund të ndëshkohet me “suspendim prej të paktën dhjetë ndeshjeve ose për një periudhë specifike”.

Ndërsa, nëse tifozët shfaqin sjellje si ajo e përshkruar më lart, Federata përgjegjëse ndëshkohet me zhvillimin e një ndeshjeje me një numër të kufizuar të tifozëve dhe një gjobë prej të paktën 20 mijë frangash. Nëse një shkelje e tillë ka ndodhur edhe më parë, atëherë mund të merren vendime më të rënda – nga ulja e pikëve e deri te përjashtimi nga ndonjë garë.

Sipas nenit 16 të Kodit Disiplinor të organit qeverisës të futbollit botëror, federatat dhe klubet konsiderohen përgjegjëse për sjelljen e tifozëve të tyre edhe nëse dëshmojnë se nuk ka pasur neglizhencë nga ana e tyre sa i përket organizimit.

Kur FIFA vendos të hapë një hetim, komisioni përcakton nëse ka pasur shkelje të Statutit të FIFA-s dhe të Kodit Disiplinor. Në rast shkeljeje, komisioni mund të shqiptojë gjoba. Afati i fundit për marrjen e një vendimi, në përgjithësi, nuk është i specifikuar.

Associated Press (AP) raportoi më parë se shkeljet e Kodit Disiplinor të FIFA-s përgjithësisht çojnë në gjoba.

Çfarë kërkoi FFK-ja?

FFK-ja tha se ka dorëzuar në Federatën Botërore të Futbollit ankesë dhe dëshmi, për shkak të, siç tha, “fyerjes së rëndë të trajnerit të përfaqësueses së Serbisë” si dhe “veprimeve raciste të tifozëve serbë” gjatë ndeshjes Zvicër-Serbi.

Sipas FFK-së, shfaqja e sloganeve me mesazhe politike dhe raciste ndaj shqiptare u dëgjuan pothuajse gjatë tërë ndeshjes

FFK-ja në reagimin e saj ka kërkuar që FIFA të hetojë dhe sanksionojë Federatën serbe të Futbollit, duke argumentuar se thirrje raciste janë dëgjuar gjatë tërë ndeshjes.

“Ekipe dhe tifozë me sjellje e filozofi të urrejtjes së njeriut për njeriun nuk do të duhej të kishin vend në ngjarje kaq të rëndësishme sportive siç është Botërori ‘Katari 2022’”, tha FFK-ja.

Lojtarët e Serbisë duke festuar golin gjatë ndeshjes me Kamerunin, në kuadër të Kampionatit Botëror të Futbollit. Katar, 28 nëntor 2022.

Kjo është procedura e dytë disiplinore që FIFA inicion ndaj Serbisë. Në nëntor, pas një ankese të FFK-së, FIFA hapi procedurën disiplinore për shkak të shfaqjes së një flamuri në zhveshtoren e përfaqësueses së Serbisë, me hartën e Kosovës me ngjyrat e flamurit serb dhe me mbishkrimin “S’ka dorëzim”.

FIFA citoi një pjesë të Kodit të saj disiplinor që mbulon sjelljen e pahijshme, duke përfshirë “gjestet, shenjat ose gjuhën fyese” dhe “përdorimin e një ngjarjeje sportive për demonstrime të një natyre josportive”.

Atëbotë, zyrtarët serbë e quajtën “hipokrizi” nisjen e masave disiplinore.

Kjo nuk është hera e parë që Zvicra dhe Serbia përballen në Kupën e Botës.

Më 2018, Zvicra e eliminoi nga gara Serbinë dhe ndeshja, po ashtu, u përshkua me tensione.

Atëbotë, Xhaka dhe Shaqiri festuan golat e tyre kundër Serbisë, duke bërë me duar simbolin e shqiponjës, që u pa si provokim nga lojtarët serbë. Për këto veprime, dy lojtarët e Zvicrës u dënuan me gjobë.

Vazhdo më shumë