Dialogu të mos vihet në pikëpyetje, kërkojnë Franca dhe Gjermania

Franca dhe Gjermania do të vazhdojnë ta mbështesë procesin e dialogut Kosovë-Serbi, i cili është pezulluar në dhjetor të vitit 2020, për shkak të situatës me pandeminë COVID-19 si dhe zhvillimeve fundit në politikën kosovare.

Ambasadorja e Francës në Kosovë, Marie-Christine Butel, në një intervistë ekskluzive për klankosova.tv ka thënë se gjëja më e

rëndësishme është që dialogu në vetvete të mos vihet në pikëpyetje dhe se kërkimi për një zgjidhje të mosmarrëveshjes me Serbinë të jetë pjesë e perspektivës evropiane.

“Qëllimi duhet të jetë arritja e një marrëveshjeje gjithëpërfshirëse, përfundimtare dhe ligjërisht të detyrueshme midis dy vendeve, e cila zgjidh të gjitha çështjet e mbetura dhe kontribuon në stabilitetin rajonal”, ka thënë Butel.

“Që nga korriku i vitit 2020, negociatat me Serbinë kanë rifilluar në Bruksel. Ndonëse, këto janë pezulluar për shkak të krizës shëndetësore dhe situatës politike në Kosovë, janë arritur disa rezultate, veçanërisht në çështjen e personave të zhdukur dhe personave të zhvendosur. Ka akoma shumë tema për t’u adresuar të cilat do të kërkojnë mobilizimin e ekipeve negociuese”.

“Franca, së bashku me Gjermaninë, është e përkushtuar për të mbështetur këtë proces dhe këtë do ta bëjë edhe me tej. Franca mbështet ndërmjetësimin e Bashkimit Evropian dhe përfaqësuesit të saj të posaçëm për dialog, Mirosllav Lajçak”.