Aliu: Aktakuza ndaj meje nuk ka bazë ligjore

Ministri i Mjedisit dhe Planifikimit, Hapësinor dhe Infrastrukturës, Liburn Aliu, është deklaruar para mediave pas përfundimit të seancës gjyqësore. Aliu tha se deri sa ishte drejtor i Urbanizmit në Komunën e Prishtinës, e ka mbrojtur pronën publike.  Ai shtoi se pretendimet në aktakuzë nuk kanë bazë ligjore.

“Përfundoj seanca e sotme, ku nga mbrojtja u kundërshtua aktakuza dhe u kërkua që të hidhet poshtë. Ajo çka kemi bërë ne dhe unë si drejtor e kam mbajtur interesin publik, në këtë rast në Prishtinën e re të ketë shkollë siç e parasheh plani. U prezantuan të gjitha provat. Që të jepet një leje duhet të bazohemi në plan dhe ne jemi bazuar në plan. Këto plane janë aprovuar nga Kuvendi Komunal dhe janë vërtetuar ligjërisht në organet që i parasheh ligji, dhe nuk ka mundësi tjetër që drejtoria e urbanizmit të jep leje ndryshe nga këto plane. Pretendimet e aktakuzës nuk ka bazë, ne kemi zbatuar ligjin dhe kemi mbrojtur pronën publike”, tha Aliu, shkruan Telegrafi. Ministri u shpreh optimist se gjykata do të merr vendimin e duhur.

Ndryshe, sipas aktakuzës, krahas Liburn Aliut, për keqpërdorim të pozitës apo autoritetit zyrtar po akuzohen edhe Ardian Olluri, Zejnulla Rexhepi, Nazife Krasniqi, Bahtie Uka dhe Mimoza Berisha Prestreshi.