Abdixhiku, Kurtit: Të sillesh si viktime, kur s’je, është dobësi

Kryetari i Lidhjes Demokratike të Kosovës, Lumir Abdixhiku, duke reaguar ndaj deklarimeve të kryet të ekzekutivit kosovar, Albin Kurti, që sic ka thënë ai, me shumë informata rreth dialogut, ka marrë në Bruksel se nga ish qeveria e udhëhequr nga LDK, ka thënë së të bësh viktimën kur s’je i tillë është e panevojshme – është dobësi.

Abdixhiku në profilin e tij në Facebook, ia ka kujtuar kryeministrit Kurti se dokumentet e dialogut i janë dhënë ditën e pranimit të detyrës.

Postimi i plotë i Abdixhikut:

Kryeministër,

Të bësh politikë është një gjë. Të bësh viktimën kur s’je i tillë është e panevojshme – është dobësi.

Dokumentet e dialogut të janë dhënë ditën e pranimit të detyrës. Është ajo dosja e kaltërt që pason me dorështrëngim nga paraardhësi yt. Aty i ke 29 faqe raport. I ke edhe dokumentet e dakorduara në secilin takim. E ke pozicionin politik të Kosovës, e analizën e ekspertëve – të njëjtëve që i ke angazhuar tani për konsultim.

Nëse s’i mbanë mend, ke mundur të pyesësh. Nëse i ke humbur, ke mundur t’i kërkosh sërish.

Nëse të janë dashur informata shtesë nga njerëzit e mi në LDK, jemi pesë minuta larg në Prishtinë. S’jemi të huaj kur është në pyetje vendi. E duam barabartë të gjithë.

Ke mundur ta bësh secilin hap ndryshe përveç ankimit para miqve jashtë. Trego përgjegjësi. S’je më opozitë. Tani je Kryeministër. Udhëheq si i tillë.