500 persona mbesin padrejtësisht jashtë listës finale të votuesve, thotë Germin

Sipas organizatës Germin, që merret me çështje të diasporës, janë edhe rreth 500 persona të tjerë, të cilët kanë mbetur padrejtësisht jashtë listës finale të votuesve.

“Problemi ka qenë se procesi i verifikimit përmes telefonit ia ka marr krejt fokusin sekretariatit të KQZ-së dhe ka ndikuar që shumë njerëz të përjashtohen nga lista për shkak të gabimeve teknike. Aty është harxhuar e tërë energjia, gjë që ka ndikuar që proceset tjera të zhvillohen me probleme”, tha Lirim Krasniqi nga ‘Germin’, transmeton Evropa e Lirë

Sipas tij, edhe PZAP-ja ka luajtur rol çorientues. “Lista u publikua shumë vonë, ndërkaq PZAP-ja na kishte refuzuar edhe neve një kërkesë zyrtare, që të paktën ankesat të pranohen përmes e-mailit. PZAP-ja e ka nxjerrë një njoftim edhe në mediat sociale se nuk i pranon ankesat me e-mail, por çuditërisht PZAP-ja i ka pranuar si valide edhe ato ankesa që janë dërguar përmes e-mail-it”, shtoi Krasniqi.